Tio Ali den Natura-Lesa di Aruba
27/10/2022
Porfin porfin, porfin porfan. Awendia tempu ta pasa lihé. Asina tur hende ta bisa. Pero e dos añanan ku a pasa a dura manera 22 aña. Tabata dos aña duru. Dos aña sin ku Tio Ali por a bishitá Aruba. Sin por a topa ku muchanan di Aruba ku semper ta duna Tio Ali tantu kariño. Dos aña sin por a topa dosentenan di Aruba, sin mira Tio Ali su amigunan di Biblioteka i sin topa koleganan outor. Muchu kos. Dos aña sin por mira e karanan kontentu di muchanan di Aruba ora Tio Ali ta konta storia, hasi poesia rítmiko i bai laga nan ta kanta Areke te Areke tá … Pero danki na Papa Dios ku e aña aki nos por topa atrobe.
E bia’ki no online pero riba tera. I sigun Tio Ali ta bai di un skol pa otro e ta disfrutá di e Natura-Lesa di Aruba. Dushi Asina. E aña aki Tio Ali mester a skirbi tres kuenta pa e “Regalo di Siman di Ban Lesa” di Kòrsou. Na Kòrsou e Siman di Buki yama: “Siman di Ban Lesa”. I e aña aki e tema di Siman di Ban Lesa, meskos ku na Aruba ta naturalesa. I e lema ta: “Bi-ba-bèrdè!”. Mi no a puntra niun bia na Kòrsou dikon a parti e Bi-ba den sílaba i bèrdè nò. Ra ra ra … Kontal e tres kuentanan mester a trata e tópiko Biba bèrdè. Título di e kuentanan di Tio Ali ta: 1.Bario Bèrdè Bunita, 2.E Buriku di Shete Boka, 3.Pachi Gran a Biba Bèrdè. Komo tur tres ta trata e tema Natura-Lesa Tio Ali lo sera e muchanan muchanan di Aruba tambe konosí ku e storianan ora e bishitá nan skol.
Tio Ali a yega di skirbi un storia pa e Regalo di Festival di Buki pa Mucha di Aruba tambe. Esei tabata un gran honor i muestra di kariño i apresio pa Tio Ali. Ta pesei Tio Ali ta haña ku e dos añanan ku mester a warda pa bolbe Aruba tabata manera 22 aña. Título di e storia ku Tio Ali a skirbi pa e Regalo di Festival di Buki pa Mucha di Aruba ta: “Man di Amistat”. Esei tabata e Regalo di Festival di Buki pa Mucha di aña2018. Título di e buki di e aña ei ta: “Amigonan tur caminda”. E siguiente aña, ku tabata aña 2019, Biblioteka Nashonal Kòrsou Frank Martinus Arion tambe a saka su promé Regalo di Siman di Ban Lesa. I den e promé edishon ei Tio Ali tambe tabatin e honor di skirbi un kuenta pa e buki regalo. Título di e kuenta ta: “Ranella ke bira turista”. E buki a sali ku e título: “Ban keiru i deskubrí Kòrsou”. Na aña 2020 Tio Ali no a publiká ningun storia. Pero na aña 2021 Tio Ali a keda aserká pa Levendig Uitgever ku e petishon pa skirbi un poesia na Hulandes pa bai den e buki titulá: “Zijn wie je bent, worden wat je wil”. Pa e buki ei Tio Ali a skirbi un bunita poesia titulá: “Ik Wil Groeien”. Promé ku tur esakinan, 22 aña pasá Tio Ali a publiká su promé storia pa mucha titulá: “Choi a mua papa papa”. I na aña 2016 Tio Ali a trese pa Aruba su muchanan e buki di rima titulá: “Mannan di Futuro di Aruba”
Scroll To Top
