Pepe Picuda y Didi Djindja
02/09/2024
Ilustradora di e buki ‘Pepe Picuda y Didi Djindja’ a pasa bishita nos un rato. Sheila Werleman, Diseñador grafico y ilustrador di buki, a regala biblioteca 3 ehemplar di e buki ‘Pepe Picuda y Didi Djindja’ pa nos coleccion di Dept Hubenil. Autora Desiree Correa a skirbi e buki y e publicacion a sali riba mercado na 2011. E ta disponibel pa mucha lesa of fia na biblioteca. Pepe Picuda y Didi Djindja ta 2 pisca den lama cu a namora di otro. Dos pisca masha bunita.
Ademas Sheila a regala biblioteca 3 ehemplar di su produccion propio, e revista pa mucha ‘Cleconchi’. Na 2010 Sheila a publica e revista aki, diseña pa mucha di 5 pa 12 aña. Esaki ta un edicion special cu ta papia di buki pa mucha, e tin wega, obra di man, puzzels, informacion educativo, plachi pa kleur y mucho mas. Un revista hopi special, hopi colorido y cu hopi sorpresa. Sheila tin su mes Studio ‘Smile Art & Design’. Masha danki Sheila!
Sheila su pasion ta pinta y ela haci entre otro un estudio den Diseño Grafico na Hulanda. E tin un amor special pa ilustracion pa mucha. Sheila a ilustra diferente buki pa mucha manera: ‘Kitrin di Florin’ di e autor Eveline Ruiz-Croes, ‘Si bestia por a papia’ di e autor Jacques Thönissen, ‘Landa Lily’ di e autor Mili Arends y ‘Nini ta loer’, di Mercedes Petrocchi. Na 2011 Sheila a ilustra e buki ‘Pepe Picuda y Didi Djindja’ di autor Desiree Correa, cu tabata e regalo di siman di buki. Tambe el a ilustra e buki ‘E grito di e shoco – balia cu biento’.
Scroll To Top
