Exposicion ‘Vanessa and friends’ na San Nicolas

12/03/2019

Biblioteca Nacional Aruba ta presenta un exposicion titula ‘Vanessa and friends’ den su edificio renoba na San Nicolas. Esaki ta habri pa publico den Dept. Hubenil segun orario regular di biblioteca.

Artista visual Vanessa Paulina a ilustra e buki di Festival di Buki pa Mucha titula, ‘Amigonan tur caminda’. Publico lo por wak e ilustracionnan di e buki y naturalmente e buki mes. Diahuebs dia 21 di maart Vanessa Paulina lo conta storia pa mucha y e ta conta algo di su ilustracionnan. Tur mucha ta bon bini na biblioteca San Nicolas, dept Hubenil, di 3or pa 4or. Pa tur mucha presente lo tin un ehemplar di e buki ‘Amigonan tur caminda’.

E buki ta un compilacion di storia di Richard Dabian, Robert Reeberg, Reginald de Palm, Sergio Tjie-A-Loi, Gino Vrolijk, Alvin Inecia (Tio Ali), Crisen Schorea, Daniëlle Schothorst, Denise de Jongh-Rekwest, Diana Marchena-Martes, Evelien van Dort, Indra Hu-Ramdas, Jeroen Hoogerwerf, Liliana Braamskamp-Erasmus y Mariska Hammerstein. E ta yen di storia pa mucha di scol basico. Storianan di amistad entre mucha, bestia, hende di diferente cultura. ‘Amistad’ ta e tema di e Festival di Buki pa mucha e aña aki.
Vanessa Paulina a capta cada storia den un imahen colorido.