Meneer Reeberg a skirbi hooopi storia pa mucha
13/09/2024
Na 2024 biblioteca ta invita tur mucha lesa mas storia y buki. Storia cu personahe poco rebelde, poco stout kizas, tocante mucha cu tin un kier, mucha cu ta gusta dicidi pa nan mes y ta gusta aventura. Lesa buki pa mucha cu diferente personahe y lesa con dushi e ta pa haci cos manera bo ke!
Pa e Festival di Buki pa Mucha 2024 nos ta lagabo cera conoci cu diferente autor di buki pa mucha cu ta trece un storia y tambe ilustrador cu ta ilustra storia. Meneer Reeberg ta gusta skirbi storia y e ta bay sigui haci esaki tambe!
Meneer Robert a nace dia 31 di oktober 1953 na Lago Heights, San Nicolas, Aruba. Como mucha el a bay Commandeur Pieter Boerschool kleuter, scol basico y MULO. Despues el a sigui pa HAVO na Colegio Arubano na Playa. Y despues el a bay e Academia Pedagogico Aruba (APA e tempo ey). Na aña 1975 el a bira maestro di scol. Algun aña pasa el a bay cu pensioen y awo e tin tur tempo di mundo pa disfruta di tur e hobbynan cu e tin. Meneer Robert su hobby faborito ta: skirbi! Y esaki e ta haci riba tres tereno: E ta gusta skirbi storia, e ta gusta skirbi poesia y e ta gusta skirbi cantica. For di chikito caba e tawata gusta skirbi. El a publica 11 buki pa mucha.
Algun aña pasa el a haya den un caha di potoshi na su cas e prome poesia cu el a yega di skirbi tempo cu e tawata un mucha di 12 aña. Na APA unda meneer Robert a siña pa bira maestro di scol, el a siña toca guitara. Eynan e interes den traha cantica a nace. El a compone masha hopi cantica di mucha. Actualmente e tin mas cu 180 cantica traha. Banda di esey e tambe a compone cantica di gospel, cantica pa diferente ocasion manera Bruid, Hacimento di aña, Himno di diferente scol, Canticanan di Pasco etc. Den pasado el a traha e cantica di e Festival di Buki pa Mucha di diferente aña.
Meneer Robert kier stimula tur mucha pa lesa, pasobra lesamento ta relaha bo. E ta mehora bo concentracion. E ta amplia bo vocabulario y e ta engrandece bo imaginacion y creatividad. Coy un buki y ban lesa!
Publicacionnan di Robert Reeberg:
“Cu propio esfuerso y financiamento mi a yega di publica 11 buki pa mucha:
‘Tur pa mi’ (poesia), 1999, ‘Cant’i lama’ (poesia), 2008. ‘E anochi cu Sinterklaas a topa cu Santa Claus’, 2008. ‘Capa blou’, 2009. ‘E hobby di Rino’, 2010. ‘Shete den un solo tiro’, 2012. ‘E mago di Sero Teishi’, 2013. ‘Cindy Rella’, 2013. ‘Un bula den lama’, 2015. ‘Rigoberto’, 2016. ‘Roy ta Piet’, 2016.
Banda di e dos bukinan di poesia pa mucha akiriba menciona, mi tin dos tomo di poesia pa adulto, esta ‘Blo sunu’ y ‘Man teni’ na caminda. Na aña 2018 mi tambe a participa cu otro autornan na e buki regalo di e Siman di buki yama ‘Amigonan tur caminda/Overal vrienden’ cu e storia ‘Proefwerk pisa’/’Een moeilijk proefwerk’.
Na aña 2020 mi tawata un di e cuater autornan invita pa skirbi un storia pa e buki di Festival di Buki pa Mucha, titula ‘Schelpeneiland/Ora Ubao’. E storianan cu mi a skirbi pa e buki aki ta: ‘Verdwaald in het donker(Perdi den scuridad)’, ‘Het paard dat niet wil zwemmen (E cabay cu no kier landa)’, ‘Het fort en de toren (E forti y e toren)’, ‘Feest in de stad (Fiesta den ciudad). Na aña 2021 mi a contribui, hunto cu 21 otro autor di Antia y Hulanda, na e buki pa mucha ‘Zijn wie je bent, worden wat je wil’ cu e poema ‘De spion’.
E aña aki (2024_ mi ta un di e autornan den e buki produci pa e fundacion di St. Maarten Beyond Kultura Events Foundation, cu a pidi autornan di Antias, Surnam y Hulanda pa skirbi un storia of poema en conexion cu e celebracion di 160 aña di abolicion di sclavitud. Orguyosamente mi por bisa cu mi ta e unico autor di Aruba den e buki aki yama ‘Van slavernij naar vrijheid’ cu e poema ‘De traan’.”
Scroll To Top
